21 март куни ижтимоий тармоқларда Урганч шаҳрида жойлашган «Саҳара» клуби ёнида бир гуруҳ қизлар сумалак пишираётгани видеоси тарқалган эди. Кейинчалик видеода акс этган 6 нафар аёл суд қилинди ҳамда уларнинг 3 нафари 15 суткага қамалди. Яна 3 нафари эса ёш болали бўлгани сабабли энг кам ойлик иш ҳаққининг 5 баравари миқдорда жарима тўлаш шарти билан озод қилинди.
Rost24 ахборот сайти мухбири ушбу аёллардан бирининг дардига қулоқ солди.
» — Хоразмда камида 20-30 та тунги клуб бор. Уларнинг ҳар бирида 15-20 нафардан биз каби раққосалар ўйнайди, фақат биз эмас раққосалик қилаётган.
Мен мана шу суд ва ОАВдаги шармандаликдан сўнг кўчада қолдим. 4 йилдан бери икки хонали уйда ижарада яшар эдим. Уйга кир ювиш машинаси, кондиционер ва қиммат гиламлар ҳарид қилганман. Шунга қарамай видео тарқаб кетгач, мана ижарачи мени кўчага ҳайдаб юборди. Иш жойимдан ҳам ҳайдалдим.
Милиционерлар қистови билан 1 500 000 сўмга раққосалик учун гувоҳнома сотиб олган эдим. Лекин, энди иш жойимга қайта олишмаяпти. Отам мендан юз ўгирди. Бугун ўта тушкун аҳволдаман. Энди қандай кун кўраман», – дейди аёл.
Унинг айтишича, ота-онаси 15 ёшида турмушга узатишган. На ҳунари, на маълумоти бўлган 9-синфни битирган қиз эри билан олти йил яшаб, икки фарзандли бўлади. Кейин уни турмуш ўртоғи ташлаб кетади.
» – Ҳеч ким менга ўшанда ёрдам бермаган. Ҳозир 26 ёшдаман. Эрим учинчи бор уйланган. Фарзандларим собиқ эрим – отаси билан яшайди. Мен ҳам улар билан учрашиб тураман.
Кредитга уй олаётган эдим. Сўнгги бор март ойига тўлов қилдим. Энди ишсиз қолиб кредитларимни қандай қоплашни ҳам билмай қолдим. Ҳеч ким ёрдам бераётгани йўқ. Мен доим ўзимни-ўзим эплаб келганман. Шу вақтгача ҳеч ким менга ёрдам бермаган. Ўзим йиқилиб, ўзим турганман. Бировга зарар қилмаганман, бировнинг оиласини бузмаганман. Нонсиз қолган кунларимда ҳам ҳеч ким менга ёрдам бермаган. Видеоимизни ижтимоий тармоққа жойлаган қиз сабаб, мана бугун кўчада яна ишсиз, уйсиз қолдим.»
Ишсиз, жойсиз, бўйинида бир тонна кредит қарзи билан қолган аёл энди кунини фоҳишалик билан ўтказишини айтган.
Биз қандай ота-оналармизки, қизларимизни балоғатга етказмасдан олов ичига отамиз? Биз қандай эрмизки, оиламизга қалқон бўлолмаймиз? Биз қандай отамизки, жар ёқасида осилиб турган ожиза қизимиздан юз ўгириб, уни чуқурликка итариб юборамиз? Биз қандай элмизки, қилмишига пушаймон бўлганларни ҳам кечиролмаймиз?
Сизнингча, тунги клуб эгаси аёлларнинг бу каби номақбул ҳатти-ҳаракатларидан бехабар эдими? Уйини ижрага берган хонадон эгаси, бу аёлларни нима билан шуғулланишини билмас эдими? Билишарди. Хабордор эдилар. Лекин ҳамма шармандаликнинг бир учи ўзига келиб тақалишидан ҳимояланиш билан оввора.
Жар ёқасида турган синглимизга маслаҳатим бу гал яна йиқиладиган бўлиб турманг. Вазиятдан чиқишнинг ҳалол йўлини танланг. Тўғри йўлнинг машаққатлари кўп бўлади. Чадасангиз охирида мукофотини албатта оласиз. Фарзандларингиз олдида юзингиз ёруғ бўлади.
