26 декабрь куни Канаданинг Онтарио провинциясида коронавируснинг илк бор Британияда қайд этилган янги тури аниқланди. Эътиборлиси шундаки, Онтариода коронавируснинг янги турини юқтириб олган икки киши яқин орада ҳеч қаерга саёҳат қилмаган. Онтарио провинсиясида 26 декабрдан бошлаб локдаун ҳолати жорий қилинди.
"Коронавируснинг янги варианти аниқланиши онтариоликларнинг иложи борича уйда қолишлари ва барча тиббий кўрсатмаларга амал қилишларига, хусусан, бугундан бошланаётган қатъий чекловларга бўлган эҳтиёжни оширади” дейди Онтарионинг Бош тиббиёт ходими ўринбосари доктор Барбара Яффе.
Онтариода сўнгги икки кун ичида 4301 кишига коронавирус ташхиси қўйилган. Бу провинцияда ўтган 12 кун давомида кунига 2 мингдан ортиқ одамнинг CОVID-19 га чалингани қайд этилиб келинмоқда.
Олимларнинг айтишича, коронаивруснинг британча варианти олдингисидан 40-70 фоизга юқумлироқдир. Аммо, олимлар ҳозиргача яратилган вакциналар ушбу вариантга қарши иш бермаслигига далил мавжуд эмаслигини ҳам таъкидлашмоқда. Яъни, вакциналар британча вариантнинг олдини олишда ҳам самара беради.
