Австрияда суд 2004 маротаба Фавқулодда вазиятлар хизматига қўнғироқ қилгани учун 20 ёшли йигитни 18 ойга озодликдан маҳрум қилди, деб хабар берди маҳаллий "Heute” газетаси.
Таъкидланишича, ҳодиса Винер-Нойштадт шаҳрида (Қуйи Австрия) содир бўлган. Иккита смартфон ҳамда махсус яратилган дастур ёрдамида австриялик йигит бир кун ичида Фавқулодда вазиятлар хизматига 2004 маротаба қўнғироқ қилган. Натижада ҳар 15 сонияда диспетчерлик марказига шошилинч чақирув қўнғироғи келиб тушган.
Ҳибсга олинган йигит судда ўз қилмишини зерикиш билан изоҳлаб: "Мен ҳар куни уйғониб "Netflix”ни томоша қиламан, компьютер ўйинларини ўйнайман, дўстларим билан учрашаман. Аммо баъзида булардан ҳам зерикиб кетаман», дея таъкидлаган.
Полициянинг журналистларга маълум қилишича, йигит дўстидан пул ўғирлаганликда ҳам гумон қилинмоқда.
Шу боис судья судланувчига иложи борича қаттиқроқ муносабатда бўлиб, уни бир йилу олти ойлик қамоқ жазосига ҳукм қилган. Аммо ҳукм ҳали қонуний кучга кирмаган, йигитнинг ҳимояси унга қарши шикоят қилиши мумкин.
